倒戈三人組熟晒路 紅魔讓半一嗒「糖」

猪拉多纳

愛華頓作客Big4例腳軟

今晚英超開快車，當中以曼聯主場鬥愛華頓最矚目，皆因今場波係莫耶斯接掌「紅魔鬼」之後首次倒戈，面對執教咗11年嘅舊會點可以失威先？最重要係「魔童」朗尼Fit到爆，費蘭尼又熟晒愛華頓路，「倒戈三人組」蓄勢待發，對住造訪傳統Big4例牌腳軟嘅「拖肥糖」可秤先，讓半一要上盤。

（now621台周四凌晨3:45直播）

莫耶斯今季離開愛華頓接掌曼聯，唔單止撬埋舊部屬費蘭尼過檔，仲咬住左閘巴尼斯唔放，搞到「拖肥糖」Fans憎到佢入骨。雖然莫帥上任之後，曼聯明顯冇咗「爵爺」時代嗰份霸氣，但查實「紅魔鬼」喺佢麾下最近已經連續12場未輸過，兼且目前只係落後同市死敵、「三哥」曼城3分，為面子同成績今仗倒戈一定唔衰得。
朗尼Fit爆 費蘭尼過晒料

荷蘭射手尹佩斯因為鼠蹊同腳趾都有傷未必出得，對曼聯鋒力或多或少有影響，不過朗尼呢期Fit到漏油，近5場英超勁入5球，包括上仗鬥熱刺梅開二度，腳風順成咁，相信愛華頓後防肯定有得震冇得瞓。何況「二五仔」費蘭尼賽前仲話，已經向隊友過晒料作部署，好似有晒計對付「前度」咁喎！

雖然話曼聯有菲爾鍾斯儲夠5黃要自動停賽，但作客嘅愛華頓仲濕滯，事關除咗前鋒干尼同中場吉遜之外，後防至做得嘢嗰件巴尼斯都養緊傷，靠白賴仁奧維度「嘜」路爾斯華倫西亞盞食塵！仲有呀，愛華頓已經11年未試過喺聯賽造訪傳統Big4（曼聯、阿仙奴、利物浦、車路士）贏波，英超時代去到奧脫福亦未威過，偏偏領隊馬天尼斯唔識死，賽前誓言要打破宿命，講明唔會死守坐以待斃，鬥攻起上嚟隨時畀「紅魔鬼」隊多幾粒，曼聯讓半一「依絲執」。
拖肥糖訪奧脫福20戰不勝

愛華頓過去20次英超作客曼聯錄4和16負。

曼聯對上74場英超主場賽事，只得車路士去到奧脫福保得住清白身。

雙方近6次喺奧脫福交手入球大細單跳。
大細單跳博多「士哥」

除咗朗尼呢期Fit爆之外，愛華頓前鋒盧卡古都一樣叻仔，呢隻「新魔獸」今季已經有8個入波，「魔童」「魔獸」都一樣咁Fit，加埋雙方近6次喺奧脫福交手嘅大細單跳攤路，1.7倍大梗係要兼顧啦！