羅馬 One Man Club好弱細

猪拉多纳

球壇「One Club Man」個個值得尊重，但相反「One Man Club」就唔係幾好喇。講緊嘅係托迪同羅馬，托迪一生一球會被稱作「羅馬王子」，但羅馬實在過分依賴王子，自從佢十月中鬥拿玻里受傷之後，球隊啞火，連勝亦斷纜，好彩佢哋後防硬淨，亦唔易失波，今日意甲早場主場對作客發揮麻麻嘅費倫天拿，相信入波唔多，捧細。

（TVB301周日晚7時30分直播）
冇托迪對費倫難入波

相信意甲開咧前，冇人估到羅馬攞到咁好成績，全靠老來嬌托迪，佢喺受傷前為羅馬上陣接近六百分鐘，合共貢獻三個入球及六個助攻，絕對係教頭魯迪加西亞進攻體系中不可或缺嘅靈魂人物。可惜自從十月中招之後，羅馬進攻冇咗重心，球隊成績亦冇咁Sharp，十一月四場聯賽全部和晒，幸好羅馬後防仍然保持高度集中，踢十四場只係失四球，而且仍然係意甲唯一保持不敗嘅球隊，要攻破佢哋大門確係有啲難度。

至於羅馬今仗對手費倫天拿，今屆聯賽同歐霸盃雙線發展，都算取得不俗成績，但最近兩場作客烏甸尼斯同費利拿均攞唔到「士哥」，對住防守力更強嘅羅馬，相信亦難入到波，今場直捧細。