松林之星開竅再贏

不死鸟

第一場四班1200米。「松林之星」上場在田草1200米打開勝利之門，起步唔夠快，改留後追效果更勝過往放頭跑，轉戰闊場改變跑法即有脫胎換骨演出，顯見馬匹成熟後，口勁收歛換來貫注力強，三歲仔一經開竅必可扶搖直上，復課力磨狀態更進，當銳勇馬乘勝追擊，再下一城無難度。「帝豪龍駒」剛戰如非直路彎失位影響，相信必入三甲，輸形勢得第五敗不足據，今次用回贏馬功臣高雅志操刀，馬房不分正副，有權串馬房Ｑ。
第二場四班1400米。「雅雪」季內兩戰田草1200米得一亞一殿，睇番呢兩場其狀態及成熟未足，陣上走來左閃右避可印證，經過兩場實戰，勇熟勝從前，中距離材新鮮感過後落腳轉慢，今次增程跑1400米，對牠更合發揮，韋達鍥而不捨必有所圖，質態俱備佳駟在此力足打開勝利之門。「愛拚者勝」投胡森重新打造，狀態重納正軌，操勇揀贏馬途程上陣，省招牌決心昭然若揭。
第三場三班1800米。「金鑾殿」轉投入大摩馬房後，季內上陣七次，取得三冠兩亞一季一第四，戰績彪炳全有獎金來袋，表現脫胎換骨，練者居功至偉，亦反映此匹五歲馬，目前評分仍有上升空間，大摩必把握現時黃金期，質高勇馬再爭勝途，有力贏馬添進帳。「力奇駿馬」體弱馬埋門試泥地大閘輕鬆掄元，出腳爽勁走來有前有後，走勢出色足證火氣冒升，乘勇出擊坐亞望冠可做到。
第四場四班1400米。「雄心馬主」近三戰取得兩冠一亞表現出色，之前以快放本錢取勝，上仗竟能以後勁擒敵，顯見馬匹成熟大躍進，以目前氣勢，再跑回強項1400米勝途，對手難攖其鋒，再贏無難度。「駿馬繽紛」落番四班有形勢，態況不俗馬易配高雅志壓陣，鬥志鮮明，穩取三甲一席。