噴射機當起 唔赦流浪者

猪拉多纳

今季澳職變天，上季常規賽冠亞軍西悉尼流浪者同中岸水手都跌晒Watt，反觀布里斯班獅吼同紐卡素噴射機大翻身，可謂風水輪流轉。紐卡素噴射機今日主場對西悉尼流浪者，客軍仲要讓波，明顯受高估，寧捧當頭起，力撐噴射機下盤。

流浪者攻力一向麻麻，但今季連引以為傲嘅防守都唔掂，上仗鬥包尾嘅墨爾本雄心都先失波，最後僅逼和對手，認真失禮。另外，中場球星小野伸二已經34歲，難敵歲月摧殘，表現冇上季咁勇猛。球隊表面上排第二，但處處隱憂，難以睇好。
噴射機主場不敗雙箭弗

至於紐卡素噴射機雖然星級射手希斯基因傷，抖多過踢，但另外兩位前鋒尼敦般斯同阿當泰加特，狀態當弗，足以彌補希斯基嘅位置。唔好忘記，噴射機今季主場仍不敗，包括擊敗榜首布里斯班獅吼，無懼流浪者來犯。
有線64及203台直播