基達菲細頂斷箭巴塞

猪拉多纳

至於皇馬死敵巴塞今晚則作客基達菲，巴塞天王美斯要抖到明年年頭，弗到爆燈嘅「新比利」尼馬又要坐波監，攻力大削，基達菲亦有自知之明唔會冒進，實搞到「地上最強」老鼠拉龜冇碇埋手，細盤有分頭咪錯過。

（now 632周一凌晨零時直播）
美斯養傷尼馬停賽

雖然巴塞王牌美斯已經抖咗一段日子，好彩仲有尼馬擔大旗撐住，球隊近三仗十一個入波中，佢包辦咗六粒，真係勒都勒唔住，可惜喺上輪對維拉利爾，末段因為開角球嗰陣拖延時間被罰黃牌，令佢累積五面黃牌自動停賽一場，因此今仗唔使預佢。冇咗美斯同尼馬兩把尖刀，得番柏度洛迪古斯、阿歷斯山齊士、基斯甸泰路頂硬上，巴塞嘅把握力一定差啲。基達菲一向防守唔曳，睇番佢哋近六仗嘅主場聯賽，有五場開出細盤，迎戰強敵巴塞會踢得小心翼翼，加上有沙治奧艾斯古迪路及保查費南迪斯刑滿復出，陣容復整，配合拉布戰術，隨時令巴塞冇啖好食，今仗唔慌多波入，入球細有2.29倍更值博。