修咸頓讓波聽巉「刺」

猪拉多纳

傷兵成籮 近5場聯賽未贏過

近排英超出現咗好多場大手交易，好似曼城、利物浦同埋曼聯都係大炒對手！其中熱刺上輪聯賽喺白鹿徑就慘吞紅軍5蛋，創下16年嚟主場最大敗仗，賽後連領隊保亞斯都即刻被炒魷，暫時改由前英格蘭國腳兼助教舒活擔任看守領隊一職。佢哋今晚作客對住嘅「聖人」修咸頓，近況同樣不濟，傷兵成籮近5場聯賽都未贏過，可以話係海軍鬥水兵，橫睇掂睇都係五五波局面，「聖人」要讓波梗係博熱刺1.53倍「讓客」啦！（now621台周日晚9:30直播）
海軍鬥水兵熱刺唔蝕

熱刺炒咗領隊保亞斯之後，即刻四圍搵新帥，但點知先後畀名帥希丁克同法蘭迪保亞請食檸檬。最慘係依家嘅看守領隊舒活又明顯唔夠班，佢只有5年助教經驗，從未試過正式帶隊出戰，睇番周中佢帶住熱刺出戰英聯盃8強，就1:2輸咗畀韋斯咸出局。場波佢哋仲要傷埋新進英格蘭國腳安祖斯唐辛，嚟緊撞正聖誕新年快車檔期，真係聽見都戥佢哋擔心。

本來熱刺未見起色，追打落水狗就最正路，偏偏今晚主場嘅修咸頓，近況亦唔好得幾多，完全冇晒季初嘅銳氣。「聖人」近5場聯賽未贏過，合共失咗10球咁多。而且佢哋依家傷兵滿營，門將保路錫手腕骨裂、中場雲耶馬裂腳骨、右閘尼達利基尼腿筋有事、仲連奇雲戴維斯同霍斯都因傷缺陣，殘陣出擊憑乜讓波先？