「扑錘Day」阿仙奴派禮物

猪拉多纳

今晚拆禮物日快車檔期另一場倫敦打吡韋斯咸主場迎戰阿仙奴。「錘仔幫」一向欺善怕惡，遇親強隊例必腳軟，阿仙奴幾經辛苦捱過魔鬼賽程，為咗爭標前途，今仗勢必狂「扑錘」搶分，客勝係送畀大家嘅聖誕禮物。

（now 621周四晚11時直播）
韋斯咸堪稱強隊點心

雖然殺入英聯盃四強，但韋斯咸喺聯賽已經跌入護級漩渦，狀態唔掂之餘，佢哋仲有個特性，就係遇強即屈，今季「錘仔幫」面對前列分子如利物浦、車路士、曼城、愛華頓、曼聯等全部輸晒，慘成強隊點心，從比賽中睇得出球員未踢先怯，咁嘅心態點搶分呀？

阿仙奴於聯賽捱過魔鬼賽程，暫時可以回一回氣，由於近三場只得一分，榜首位置拱手相讓畀利物浦，為咗競逐聯賽錦標，仲唔趁作客弱旅韋斯咸贏波反彈咩，以佢哋嘅技術流踢法，實搓到「錘仔幫」氹氹轉。上仗阿仙奴悶和車路士，主帥雲格極度保守一個人都冇換到，相信今仗會作出適當輪換，如養傷多時嘅德國前鋒普多斯基已隨時候命，加上近十次碰頭贏足八次，擺明格食格，客勝有買趁早。