富咸打番順唔赦老虎

猪拉多纳

英超快車期愈踢愈精彩，聖誕檔期多支名牌球隊都於落後下反勝，曼聯、阿仙奴同曼城齊齊交到貨，成功為唔少捧場客贏到錢，去到呢個階段英超競爭好激烈，投X額節節上升，呢段時間做緊獨市生意，自然大把人玩啦！

講返今次重心推介，侯城主場對富咸，捧客隊！「老虎」侯城上場對住曼聯確係打得唔錯，尾段個勢好犀利，追唔返真係有多少唔抵。呢支升班球隊經過季初連場搶分後，近期走勢似有放緩跡象，加上上場搏得咁盡，未必回得切氣。富咸換帥後明顯有改善，呢隊波班底唔差，只要打返順相信能逐漸回升，受讓可一試。

（now 624周六晚11時直播）
曼城讓得辣寧捧對家

英超富豪球會曼城主場惡到冇朋友，單計評級絕對係歐洲一線，上場砌低利物浦保持穩定發揮，不過，佢哋今場讓水晶宮兩球半實在太辣喇，快車期最緊要係拎晒三分，冇必要幫大家贏盤，呢場一於扒逆水博下盤，兼顧埋入球大博雙殺。

（now 622周六晚11時直播）