卡城換帥博反彈黑貓有難

猪拉多纳

「英超快車」繼續踩油！尋晚啱啱炒領隊博反彈嘅卡迪夫城，今仗繼續喺地頭恭候「作客蟲」新特蘭，主隊讓平半，捧1.93倍上盤！

（now621台周日凌晨1:30直播）
新特蘭作客9戰僅入3球

一向甚得民心嘅卡城領隊馬基麥基，尋晚突然被炒魷，球會暫時未宣布繼任人係乜水，但點都好，班球員見老細陳志遠咁狠辣，肯定會搏盡保飯碗，一吐上仗輸畀修咸頓嘅烏氣。佢哋今季主場試過砌低曼城同逼和曼聯，呢次對住唔識作客嘅新特蘭仲有咩好驚先？家陣卡城只係得比拿美1個養傷，其餘主力都冇病冇痛，最重要係佢哋連續2仗喺主場作戰，能夠以逸待勞，更見優勢。

新特蘭喺Boxing Day作客打沉愛華頓，但大家咪以為佢哋好醒，實情「黑貓」贏波全靠對方門將領紅兼輸12碼所致，而且佢哋件守將布朗、古拿缺陣，另一位後衞奧沙又未必踢得，殘陣出擊之餘，佢哋今季作客9戰只係入得3球，憑咩搶分？