百利高早熟可出頭

不死鸟

馬季差唔多進入倒數階段，不過伍碧權只得八場頭馬，暫時練馬師榜排包尾，為求達到馬會發牌指標，相信餘下賽事必盡力搶胡，出得嘅馬搏得就搏，只要路程合適兼有狀態支持，不妨放心捧場。

       五月一日伍廐有五匹正選馬列陣，初步心水係「百利高」，呢隻馬季內首次上陣跑新馬田草千二米，排七檔出閘後取得內叠位置慳位，末段一度出頭下，最終畀「馬來之光」趕過得亞軍﹔上仗縮程跑直路賽，起步後即搶前領放，可惜終點前不敵頭馬「加州滿意」又一次入Q，雖然仲未出頭，但至少證明成熟程度已達八八九九，適應水土方面亦冇問題。呢匹兩歲馬跟廐侶「好利高」同主，呢系馬出名鬥志鮮明，加上今場新馬千二米唔少對手都係「百利高」蹄下敗將，早熟一族係時候開齋。

        足智彩方面，今季巴塞嘅主場踢過二十八場（包括友誼賽、西甲及歐聯），當中錄得二十三勝三和，最犀利係每次都有波入，就知主場威力驚人，今晚歐聯四強首回合主場對車路士，相信大有機會先拔頭籌。

         其實去到四強賽事，照道理各隊實力差唔多，賠率上唔應該太過側重，但呢場主客和主勝初盤只得1.65倍，較外地唔少莊家仲要熱，證明馬會相當睇好巴塞贏得﹗至於車路士近五次作客魯營球場踢歐聯賽事，居然只得兩和三負，加上主隊中前場個個入球能力了得，車路士後防都唔知守得邊個好，都係買主勝穩陣。