PSG中東炸「艦隊」

猪拉多纳

伊巴謙復仇戰

今日最強戲碼肯定非巴黎聖日耳門（PSG）鬥皇家馬德里莫屬，兩隊豪門今晚會喺卡塔爾首都多哈進行熱身賽。由卡塔爾財團撐腰嘅PSG當然唔可以喺班鄉親父老面前失威，伊巴謙莫域亦要向C朗復仇，撞正今晚皇馬人腳不整，不妨冷敲2.95倍主勝。

（TVB301周四晚10:45直播）

雖然話熱身賽球隊戰意難測，但唔使擔心PSG唔認真。皆因呢場比賽係由卡塔爾足總同PSG合作，幫手推廣當地旅遊業。PSG亦趁機擴大自己喺中東地區嘅知名度，睇佢哋喺當地開埋專門店就知球會有晒長遠計劃。有咩宣傳會好得過喺咁多人面前打沉舉世知名嘅「銀河艦隊」先？相信PSG班球員已經收晒Order，落場時要打醒十二分精神。
皇馬陣容殘巴利難披甲

提起皇馬同PSG，大家焦點都會落喺雙方嘅天王C朗同伊巴謙莫域身上。伊巴謙一向唔衰得，佢上年喺世盃附加賽帶領瑞典兩戰都輸畀由C朗領軍嘅葡萄牙出局，搞到威名盡喪，肯定懷恨在心。當時有人撐呢位瑞典前鋒只係輸隊友質素唔及C朗，今次伊巴謙身邊換上班星級戰將，好似卡雲尼、拿維斯、堤亞高施華等人幫手，實加多兩錢肉緊贏波向C朗、比比等葡兵還以顏色。

皇馬喺歇冬前表現唔錯，連續12場比賽不敗，但係佢哋今仗有多位球員唔踢得，包括中場加里夫巴利、基迪拉、守將法比奧干查奧因傷缺陣，翼鋒迪馬利亞、左閘馬些路亦獲球會批准免役，3線實力受損，未必頂得住要攞彩嘅PSG。