打比郡至怕撞車 藍戰士副選都夠砌

猪拉多纳

車路士今晚會喺英總第3圈造訪打比郡，「藍戰士」由聖誕贏到元旦，愈踢愈有霸氣，就算今晚派遣部分副選兵落場，要砌低陣中擁有多位「恐車症」球員嘅打比郡依然秤高幾線，「讓客」有2.02倍抵玩吖！

（now621、633及660台周日晚10:15直播）

聖誕快車檔連挫史雲斯、利物浦，元旦日仲大炒修咸頓3蛋，「藍戰士」近期可謂強勢沒法擋。據英媒《Express》前晚透露，車路士除咗林柏特同伊雲洛域受傷肯定缺陣之外，上場聯賽做後備嘅奧斯卡杜斯山度士、韋利安同伊度奧等中前場猛將都會悉數擔正，呢班所謂「副選」件件都係世界級，夠o趙「英冠仔」打比郡啦！
施治等破不失球紀錄

唔係話睇小由麥卡倫領軍嘅打比郡，佢哋近10場英冠仲錄得8勝1和1負佳績添，不過車路士門將施治今仗只要唔失波，就會以累積209場不失球場次打破球會名將邦列治嘅紀錄，「藍戰士」條後防肯定會打醒十二分精神幫施治達成壯舉，有射手莊尼羅素倦勤嘅打比郡想搵車路士着數冇咁易。

仲有，打比郡中場烏斯泰斯2010年効力屈福特期間輸過畀車路士0:5；首席射手基斯馬田亦試過07年為諾域治披甲鬥車路士吞4蛋，最蹺係兩場波都係英總，「恐車症」咁嚴重今晚邊有運行吖？