馬里迪莫球員搶W博走人

猪拉多纳

如果一班波好多球員都有離心，係咪代表佢哋乜戰鬥力都冇晒呢？咁又未必喎！葡超馬里迪莫有成4件兵想趕喺呢個月底前轉飯鑊，佢哋都要畀辦人睇，今日响葡萄牙盃16強主場對住甲組嘅彭拿費爾，開個1.57倍主W應該冇乜難度。

（開賽時間：周日晚上11:00）

馬里迪莫喺葡超排第10位，唔上唔落半天吊，而且轉會市場開咗之後，佢哋有幾個球員都喊住嗌走，重災區喺中前場，呢班準備跳船嘅人包括巴西前鋒丹尼路戴亞斯、達利、里奧森美同埋中場希頓拉莫斯。話就話主帥卡路士彭利拿講明要啱價至放人，不過丹尼路戴亞斯已經率先畀巴甲嘅哥利迪巴睇中。正因為咁，佢哋都要趁呢段時間「騷哥利」，希望搵到份新工，唔使擔心佢哋Hea踢。
彭拿費爾8場不勝

更重要嘅係，馬里迪莫雖則12月30號喺葡聯盃先至0:0摸和咗葡甲排第8嘅彭拿費爾，兼且過去3次主場交鋒，只係贏咗對方一場，其餘兩場和晒，但係彭拿費爾近況差到爆，舊年11月底起8場波一場都未W過，踢甲組都踢到咁樣衰，今日對住屎極都係葡超中游隊嘅馬里迪莫，輸波好正常。