諾在其中:百利高質高拔頭籌

不死鸟

周五頭場新馬賽千二米，有唔少未知底蘊嘅新馬初出，其餘?參戰馬亦都只係跑過一兩場，好難估計佢哋嘅進度，形勢比較混亂。

        小妹對伍碧權馬房隻「百利高」較為有信心，前仗初出跑千二米已經入Ｑ，上場縮程跑一千米，輸咗畀大熱門「加州滿意」得第二，雖然仍未能打開勝門，但已盡顯質素。今場「百利高」回師千二米強敵已去，未開齋嘅馬一定好鬥志，應該可以先拔頭籌。

        第九場短途錦標，剛戰大摩錯失兩項大賽，呢場短途錦標大摩一於嚟個大包圍，分別派出「創惑」、「點心」及「同一世界」上陣，似乎有志在必得之勢。不過，小妹今場仍會繼續追捧姚廐「蓮華生輝」，呢匹馬季初一度受傷，到今年二月先至復出，雖然腳患已經好番晒，但係狀態始終未回復以往咁勇猛。

        睇番「蓮華生輝」近兩仗表現，前仗跑田草千二米沿途走位唔算暢順，最終只係以頸位輸畀「點心」跑第三，已交出不俗水準。上仗跑千四米女皇銀禧紀念盃，面對「好爸爸」、「再領風騷」等強敵，「蓮華生輝」抽得十三檔起步，早段被迫留到好後位置，入直路更走出大外叠蝕位甚多，最後跑第六而回，表現其實唔算曳。

        今戰「蓮華生輝」縮程跑千二米，對手冇上場咁強，抽得有利二檔，跑法應該更具彈性，改配柏寶操刀或者可以帶嚟突破。近日晨課所見，呢隻馬相當肯走，狀態已經及鋒而試，難得今仗受「創惑」、「點心」讓五磅，係時候贏番一場。