蝙蝠復甦靠得住

猪拉多纳

馬體會心繫榜首戰

華倫西亞喺歇冬假期換帥，搵嚟曾經効力球隊嘅比斯擔任教練，上仗即刻砌低利雲特，新一年打響頭炮。佢哋聽朝喺西班牙盃16強首回合，主場乘勇迎擊馬體會，對手下場將同巴塞踢「榜首大戰」，心有顧忌難贏「蝙蝠軍團」，撐1.7倍「讓球主勝」。

（開賽時間：周三清晨5:00）
華倫易帥即贏波反彈

華倫新帥比斯上年帶領聖羅倫素勇奪阿甲首循環冠軍，功力有晒保證，而且佢以前踢過西甲多年，唔擔心要太多時間適應。上仗佢哋對住同市死敵利雲特，全場佔優下淨勝2球，肯定打番起班球員嘅信心。事實上華倫鋒將皮亞堤、莊拿斯干卡維斯等人嘅質素唔差，加上守將列卡度哥斯達亦已復出，就算班尼加有傷都唔使怕，強陣出擊今場有力保住不敗。

馬體會主帥施蒙尼一向想帶領球隊打破巴塞、皇馬壟斷西甲局面，佢哋下場就回師主場惡鬥巴塞，相信球隊嘅焦點已經放咗喺呢場「6分波」身上，今仗隨時玩留力，想贏復勇嘅「蝙蝠軍團」唔係咁易。