皇馬-2重擊奧沙

猪拉多纳

巴拿貝迎仇家火氣盛

今晚西班牙盃16強首回合尾場之一，皇家馬德里坐鎮主場迎戰奧沙辛拿。皇馬歇冬前聯賽作客僅逼和奧沙痛失兩分，中堅沙治奧拉莫斯更含冤被逐，谷埋成肚火，今仗狹路相逢，加上奧沙掛住護級隨時hea踢，「銀河艦隊」勢必大炒一鑊洩憤，就算要讓到兩球，斯維照撐1.75倍讓球主勝。

（now 632周五凌晨4時30分直播）

依家皇馬喺聯賽畀巴塞及馬體會拋離5分，實拜奧沙辛拿所賜，歇冬前佢哋作客奧沙先輸兩粒，中堅沙治奧拉莫斯更兩黃一紅被趕出場，其中第一張黃牌清脆剷到波卻被吹罰，令佢喺皇馬生涯第18次做紅牌阿姑，認真冤枉，最終皇馬幾經辛苦先追和。經過上訴後，「沙拉」才洗脫第一張黃牌，但無補於事，皇馬失分已成定局，咁樣被屈梗係唔忿氣喇，今仗西盃再遇奧沙辛拿，仇人見面分外眼紅，實當佢哋係沙包咁狂打出氣。

其實奧沙辛拿慢慢走出谷底，近3聯賽不敗已經爬番上第15位，表現大有改善，不過只係多安全線2分，仍未脫離降班危機，因此寧願集中火力打護級好過喇，唔會嘥太多兵力於盃賽上，今仗放軟手腳亦係人之常情，加上近6次作客巴拿貝全部輸晒，面對如狼似虎嘅「銀河艦隊」都係凶多吉少，「讓球主客和」皇馬要讓到兩球都冇有怕，淨勝3粒或上依絲執。