比斯領蝙蝠咬爾仔

猪拉多纳

「巴塞舊生會」鬥教波叻

另一場西甲切爾達主場對華倫西亞，焦點落喺兩位前巴塞名將安歷基與比斯身上，呢場係佢哋做教頭後首次正面交鋒。雖然前者名氣較大，但教到切爾達一鑊粥，相反華倫新帥比斯貴為阿甲冠軍教頭，迅速為「蝙蝠兵團」撥亂反正，加上近年對碰食住切軍，小讓平半值得捧場。

（now 632周日凌晨1時直播）

1996年巴塞已故名帥卜比笠臣當年買入安歷基及比斯，由於安歷基係中前場萬能老倌，與大哨合作得絲絲入扣，令呢位皇馬棄將贏盡球迷歡心，以金靴之名來投嘅比斯只能屈居後備。不過踢波叻唔代表教波掂，唔計之前教羅馬嘅劣績，安歷基今季接手切爾達後差強人意，依家跌到落尾三，上仗作客皇馬原本守得好哋哋，豈料一失波後成隊散晒，完全唔識踢逆境波，眾將愈踢愈冇信心點護級呀？
新帥效應 華倫兵搶韁

雖然球員時代唔夠安歷基爭，但比斯執教經驗相當豐富，呢位阿根廷裔教頭啱啱先替聖羅倫素勇奪阿甲首循環錦標，並於歇冬嗰陣獲華倫力邀回巢。比帥擅於激勵士氣，周中西盃迎戰勁旅馬體會，落後一粒依然照攻，鬥到補時3分鐘由普斯迪加扳平，睇得出眾將永不放棄嘅精神，喺新帥效應之下，球員定必搶韁博上位，加上近六次交手華倫贏五次，今仗食硬切爾達喇，呢個上盤捧得過。