鳳凰３連勝唔收手

猪拉多纳

妹頭呢幾日都喺日本雪山度過，凍成咁最好梗係浸番個溫泉，上半身一片片雪跌落膊頭、下半身畀溫泉水包圍，真係「冰火享受，世界我有」！

入番正題，今日澳職下午有場獨腳戰，由威靈頓鳳凰主場對中岸水手。鳳凰係新西蘭地膽，可惜今季喺主場冇晒威力，直到早前聖誕先贏ＦＣ悉尼取得首勝！不過自此之後，成隊波好似重拾信心，至今3連勝更係上季至今嘅最佳成績。雖然鳳凰王牌射手伊菲爾長抖，不過呢位球員今季表現一般，呢輪冇佢鳳凰攻力唔似有減弱。當然教頭摩力克都不敢怠慢，立即簽入斐濟箭頭基舒拿補充實力，唔知會唔會同呢排着晒火嘅侯斯甘斯同泰拿保特擦出新火花呢？
水手賣「靈魂」自我放棄

鳳凰愈戰愈積極，相反水手就好似比較消極，新西蘭國腳麥堅治已經被借到仙台維加泰，水手甘願自我放棄中場靈魂，而馬高斯科利斯又告受傷，一向踢法保守嘅水手中場實力大減，新教頭菲摩斯上任後球隊表現又好唔穩定，今日當然寧要當頭起，支持讓平半嘅鳳凰啦！

（有線64及203台周日下午2時直播）
妹頭推介：威靈頓鳳凰（上盤）