森多前鋒着火追擊烏甸

猪拉多纳

意甲頭場森多利亞主場對烏甸尼斯，兩隊剛於上周中出戰意大利盃，但命運各異，森多被羅馬淘汰，烏甸則擊敗國米。不過並唔代表烏甸今場可以佔優，事關佢哋作客表現好差，即使面對下游球隊都經常輸波，切勿因一場盃賽爆冷而高估佢哋。森多利亞連遭兩支勁旅所挫，捱過魔鬼賽程，相信會柳暗花明立即反彈，平手盤要主隊。

（TVB 301周二凌晨2時直播）

森多利亞近兩仗先後作客不敵拿玻里同羅馬，實屬非戰之罪，其實佢哋對同級數對手演出不俗，近期鬥拉素、帕爾馬、國際米蘭等中遊球隊都力保不敗。森多最煞食地方係一對前鋒艾達馬田斯同加比亞甸尼，兩人今季已合共攻入十一球，叻過唔少大球會鋒線組合，睇好佢哋可以撕破烏甸尼斯防線。
迪拿達利冇料到

烏甸喺意盃主場小勝國米，但要留意球隊水準非常反覆，今季本土賽事未試過連勝，作客對弱隊基爾禾、卡坦尼亞、阿特蘭大都輸波收場。射手迪拿達利正陷入球荒，對上一次入波已經係去年10月，仲要係12碼；另一位正選前鋒路爾斯梅利爾因傷缺陣，今仗勝算甚低。