鵝雞大戰 撐史雲斯

猪拉多纳

英超動物大戰，「天鵝」史雲斯主場大戰「鬥雞」熱刺，近期頹勢嘅「天鵝」備受降班威脅，為護級實搏，反觀熱刺領隊舒活近日講明球隊喺今個轉會窗將有入有出，軍心自然不穩，「鬥雞」今場難啄死「天鵝」，主隊受讓值捧，一於揀讓球主勝﹗

（now 621周日晚9時30分直播）

「天鵝」近排飛唔起，聯賽近7場不勝，搞到同榜尾嘅新特蘭只差4分，就快跌落降班區，但凡事唔可以睇表面，史雲斯近排連場惡戰，愛華頓、車路士、曼城、曼聯無論實力同兵源都強過佢哋，真係好惡啃，失分屬正常，而且隊波喺呢幾仗表現其實唔差，若非愛華頓嘅巴克里喺臨完場射入一記靚罰球，「天鵝」或唔會3分全失、作客車路士亦差啲逼到車仔入絕路，隊波真係唔係想像中咁頹。領隊米高勞特立亦深知球隊備受降班威脅，日前就下令球員一定要為護級搏命，相信球員今仗一定唔敢放鬆。
球員有離心 熱刺不穩

熱刺嘅隊徽係一隻鬥雞，但呢隻「鬥雞」今季唔係特別勇猛，係領隊舒活接手後先有番啲起色，但「鬥雞」今場戰「天鵝」難言穩勝，皆因佢哋對上六次作客史雲斯只係贏得一場咁大把。加上熱刺有人滿之患，有球員為得更多上陣機會踢世盃而想走，比利時中場查迪尼就率先表明話想離隊，舒活日前更證實球會今個轉會窗有買亦有賣，見到咁樣球員好難真心為球會賣命，今場作客實在讓唔起「天鵝」，捧讓球主勝。