遇伯樂法比仔愈見重要

猪拉多纳

大家見到我今日句金句，係咪以為法比加斯轉會曼聯或者回歸阿仙奴成功，係咩？唔係喎！今季西甲雖然繼續有美斯同C朗激鬥，仲有加盟巴塞嘅「新比利」尼馬，再加上由施蒙尼帶領異軍突起嘅馬德里體育會，但都掩蓋唔到法比加斯嘅光芒。

其實法比仔今季喺各項賽事加埋入咗11球及貢獻13個助攻，以一個中場球員嚟講可謂好唔錯，整體成績唔比受傷嘅美斯及剛加盟嘅尼馬差，原因係因為教練馬天奴。

巴塞喺佢執教之下，三線賽事西甲、西班牙盃同歐聯都仲叫緊胡，呢名伯樂對法比加斯呢匹千里馬好重要。法比加斯現時喺馬天奴麾下比哥迪奧拿及維蘭路華嘅時代更被看重，大部分都有正選之餘，好多時仲踢足90分鐘咁濟。
馬帥理念任球員發揮

Peter都幾鍾意研究教練嘅思維，馬天奴係一種另類教練，畀好多自由度球員，佢強調球隊不需要標奇立異，任球員喺球場上自己發揮，幾時節奏收慢，甚至踢得好迂迴都唔介意，因為喺馬天奴嘅理念，落球場嘅始終係球員，唔係佢自己，咁樣做畀到好大信心班球員，呢種方法有啲似NBA名帥積遜教練。

隨住巴塞大腦沙維同恩尼斯達年紀漸大，法比加斯呢名曾經擔當阿仙奴隊長嘅中場球員，其位置更加穩如泰山，其他球隊想撬佢根本冇可能。
金句：重見天日的法比加斯