破百曼城大起韋斯咸

猪拉多纳

三支勁箭輪流發威

曼城喺英格蘭聯賽盃四強首回合主場對韋斯咸淨勝六球，次回合作客韋斯咸再被捧成一面倒熱門，主帥比歷連尼高調表明要做四冠王，射手迪斯高就話要繼續士哥浪潮，而且球隊今季入球數成功破百，真係勁到癲，撞啱「錘仔幫」防線天殘地缺，相信又會上演另一場入球騷，捧大盤最穩陣！

（TVB 301周三凌晨3時45分直播）

曼城現時兼顧四條戰線，比歷連尼指出球隊信心處於高點，唔單止正選十一人弗爆，而係全軍上下都充滿戰意，佢話球隊實力強勁，絕對有力完成四冠王偉業。事實上，大軍經過上周英超後，喺各項賽事射入103球，鋒力驚人，三大射手迪斯高、尼格度同阿古路都喪入波，前者更話要繼續士哥，落到場唔會Hea踢。
6球在手 點玩都得

曼城有六球在手，晉級只係時間問題，但由於球隊後備力量實在太強，就算輪換人腳仍然好勁。會方早前將瑞典年輕射手約翰古達迪借咗去史篤城，前線三大射手輪住用，無論出邊個都係咁有威脅。至於中場拿斯尼及魯迪維爾等人要養傷，但仲有占士米拿呢類高質後備兵撐住，影響唔係好大。

韋斯咸只為面子而戰，傷愈復出嘅中鋒安祖卡路爾有機會擔正攻堅，有本錢爭取士哥。不過，佢哋最大鑊係防線人腳唔齊，守將雲斯頓列特、佐治麥卡尼、迪美同祖爾奧拜恩全部傷晒，整條防線唔同晒咁滯，都幾難頂得住對手強攻。兩軍今季兩次交手，曼城贏晒入九球失一球，今戰都係大勝格。