朗尼猛虎撲貓「大」開殺戒

猪拉多纳

英格蘭聯賽盃4強次回合

聯賽落後緊「一哥」阿仙奴14分，足總盃又出埋局，歐聯戰場強隊林立又唔慌惡得出樣，曼聯今季最有機會爭嘅只係得番聯賽盃。4強首回合「紅魔鬼」1:2輸畀新特蘭，領隊莫耶斯賽前逼朗尼復操，務求今晚返到奧脫福向對手狂轟猛炸，不過定海神針尼曼查維迪要坐波監，對住有弗爆快翼阿當莊臣孭飛嘅新特蘭唔係贏硬，熱捧1.59倍大最明智。

（TVB301及廣東體育周四凌晨3:45直播）

曼聯禮拜一凌晨大敗畀車路士1:3，「天真隊長」尼曼查維迪賽後終於轉口風承認奪標無望，連精神領袖都咁講，陣營士氣好極有限啦！爭一步就可以殺入聯賽盃決賽，曼聯領隊莫耶斯為份工定抑或面子都好，今晚喺次回合出擊絕對係非勝不可。
莫耶斯逼愛徒復出

據英國《鏡報》透露，受鼠蹊傷困擾嘅前鋒朗尼，喺當地時間禮拜一閉門操咗兩課，莫耶斯為保住飯碗懶理愛徒傷勢，賽前暗示會逼「魔童」提早喺今仗復出，擺到明想喺呢場次回合關鍵大戰晒冷。有「猛虎出柙」嘅朗尼肩負攻擊重任，曼聯火力肯定會大大提升，主場面對連續6仗有失波嘅「黑貓」，照計要撕破對方防線唔難。
新特蘭AJ近4戰入5球

之不過咁喎，新特蘭都唔係善男信女，繼首回合爆冷砌低曼聯之後，佢哋打後喺聯賽贏富咸4:1，上仗就算早早落後修咸頓兩粒都追得番，證明由普耶領軍嘅「黑貓」，無論火力同韌力都唔講得笑。查實呢排新特蘭之所以咁Sharp醒，阿當莊臣絕對係最大關鍵，「AJ」近4場波入咗5球，新特蘭最近11個「士哥」有9球都關佢事，有呢位Fit爆快翼衝鋒陷陣，作客要隊爆有尼曼查維迪坐波監嘅曼聯防線，唔係天方夜譚，既然大家都有入波本錢，梗係要捧大啦！
Data King：紅魔9次入4強8次過關

‧新特蘭連開4口入球大。

‧曼聯近7仗未試過半場領先。

‧「紅魔鬼」近9次出戰聯賽盃4強有8次晉級。
乜都玩錦囊：新特蘭少大敗博讓和

新特蘭過去46年未試過喺奧脫福贏波，近22年亦未曾殺入過盃賽決賽，4屆聯賽盃盟主曼聯確係有望贏波晉級。但係考慮到「黑貓」近13場波只係輸3鋪，而且3場敗仗都只係僅輸，曼聯想炒起對手都唔易，3.6倍「讓和」有得諗。