聖日耳門法足盃出局要洩憤

猪拉多纳

法甲今晚有場巴黎聖日耳門作客對甘岡，豪門球隊巴黎聖日耳門剛於法足盃32強被淘汰出局，球員谷埋一肚火自然希望於聯賽贏波一洗頹風。甘岡剛於法足盃踢足百二分鐘先淘汰非聯賽球隊干卡紐，球員身心俱疲下未回氣，相信難擋對手攻擊，捧入球大。

巴黎聖日耳門剛於周中法足盃32強主場面對下游球隊蒙後利埃，球隊該仗初段只派出卡雲尼攻堅，於打成1比1後雖換入伊巴謙莫域加強攻力，但最終未能取得入球之餘更被對手攻破大門慘遭淘汰。巴黎聖日耳門今季目標本應係盡擸所有錦標，如今法足盃出局自然令老闆不太高興，一眾球員自然要盡快贏波冧返老闆，相信今仗一定希望盡數對手。
甘岡周中搏到殘

甘岡同樣於周中要踢法足盃32強賽事，球隊面對非聯賽球隊干卡紐激戰百二分鐘才以3比2擊敗對手晉級，但球員身心俱疲下今晚火併一哥，未必回得切氣，面對谷埋一肚火的巴黎聖日耳門相信難以抵擋對手進襲，而且球隊近六場聯賽皆未贏過狀態只屬一般，今仗勢必成為炮灰，阿謙捧入球大。
TVB 302直播

now 714直播