阿聯主Ｗ有信心

猪拉多纳

甘巴爾執掂表現大翻身

論到最近最強勢球隊，唔係威靈頓鳳凰就係阿德萊德聯。「阿聯」最近6仗連取14分，保持不敗，比起再之前9輪先攞得嗰6分，真係算大翻身！以「阿聯」依家個勢，睇嚟甘巴爾要帶領球隊殺入季後賽都再唔係夢想。球隊大腦卡路斯卡小傷復出後，表現仲好過之前，一班球員亦開始適應甘巴爾嘅執教風格，今回對住墨爾本雄心勝望高。

（有線64及203台周六下午2時30分直播）

今個星期澳職最大新聞，當然係墨爾本雄心畀富豪球隊曼城收購咗啦，同曼城拉上關係後，當地球迷就梗係寄望「雄心」可以成為亞洲一級勁旅，但首先變嘅，可能只係佢哋球會個名囉。

其實大家都知遠水唔能夠救近火，阿古路、迪斯高亦唔會今時今日轉借過嚟「雄心」幫手！依家長期排喺榜尾，又點可以奢望爭入季後賽呢？自己目標不明之下，咪盞成為各隊搶分提款機！上輪主場贏紐卡素噴射機都係咁啱得咁蹺，今日作客「阿聯」無咁輕鬆喇。
曼城遠水難救雄心近火

正所謂「在家千日好」，我「妹頭」呢個月唔喺香港， 在外面流離飄泊拍嘢，雖然見識到異地風情同飲食，但始終都係住家飯好味啲，尤其是有乜頭暈身唔舒服嗰陣，就特別掛住屋企張床。

所以我都好明白小野伸二，佢雖然喺澳職西悉尼流浪者發展順利，但就突然宣布季尾會返國加盟日乙札幌岡薩多。小野唔計較球會實力，只希望返歸重拾家庭樂，相信班「西流」擁躉都理解嘅。