入波入到唔識停曼城屠殺屈福特

猪拉多纳

曼城主帥比歷連尼早前講明球隊要爭做「4冠王」，佢哋今晚喺英格蘭足總盃第4圈（32強）主場對英冠嘅屈福特，球員肯定唔會揸流攤。事實上，「藍月亮」入波入到唔識停，加埋個無敵主場都足夠嚇到對手腳軟，就算佢哋今晚讓2球都冇有怕，撐1.72倍「讓球主勝」。

（開賽時間：周六晚11:00）
無敵主場12連勝

曼城上星期六砌低卡迪夫城後，成為歷來「入球最快破百」嘅英超球隊，球隊火力毋庸置疑！即使射手尼格度養傷，仲有阿古路同迪斯高壓陣，就連另一鋒將祖維迪都復出，配合球隊主場12連勝氣勢，唔難上演一場大屠殺。佢哋上場喺英聯盃4強作客韋斯咸，就算賽前手握6球領先優勢亦冇留手，照派3蛋畀「錘仔幫」，今次重返主場肯定繼續開火。

屈福特射手迪尼賽前承認今場超難踢，呼籲隊友唔好未打先怯，又減壓話就算輸波都唔失禮，睇到佢哋冇咩信心。咁又難怪佢哋嘅，守將賀賓、加比爾安祖拿等4件唔踢得，門將艾蒙尼亞効力阿仙奴時表現已經一般，今次對住近3仗轟入12粒嘅曼城，睇嚟要捧多幾隻蛋走。