多蒙特歎「斯」房菜

猪拉多纳

twitter下戰書要全取3分

德甲經一個月歇冬後，下半季揭開戰幔！其中喺歇冬期間備戰締造4連勝，進攻火力全開嘅多蒙特，今輪主場迎戰「私房菜」奧格斯堡，吼實1.75倍「讓球主勝」冇走雞！

（有線61及201、中央5台周六晚10:30直播）

「蜜蜂兵團」喺歇冬期間約戰標準列治、波琴、凱沙羅頓同杜伊斯堡，最終贏晒不特止，入波更一場比一場多，羅拔利雲度夫斯基、奧巴美揚、米希達利恩等中前場猛將全部有進帳，證明狀態弗到漏油，而最後嗰場怒炒杜伊斯堡六個一皮之後，佢哋更喺官方twitter向奧格斯堡「下戰書」，話準備好今晚攞足三分。
奧格斯堡池東沅下季做蜜蜂

其實又難怪多蒙特咁有信心嘅，奧格斯堡自從11/12年球季升班德甲開始，連續兩季聯賽作客分別以0:4同2:4輸波，今季首循環喺自己地頭鬥「蜜蜂兵團」亦淨吞4蛋收場，將奧格斯堡稱為「蜜蜂私房菜」，真係一啲都唔過分。當然，多蒙特中堅拍檔蘇保迪同曉姆斯養傷，防線睇落唔夠穩陣，不過教頭高普喺呢4場友賽不斷試用唔同嘅中堅配搭，相信今場點樣排陣布防早有腹稿。

至於奧格斯堡雖然唔值得追捧，不過都有值得留意嘅地方。喺冬季轉會窗從新特蘭再度投效嘅南韓國腳池東沅，落實今夏以自由身加盟多蒙特，今晚面對「未來米飯班主」梗係搏盡，但礙於奧格斯堡同多蒙特嘅實力差距，就算池東沅踢到曉飛，睇怕都幫唔到幾多。