皇蘇雙箭射爆艾爾切

猪拉多纳

球迷影靚相鼓勵格尼路

身為球員，有咩感動得過見到球迷對自己不離不棄先？季初借咗去皇蘇嘅格尼路，因傷冇機會披甲，但係班皇蘇球迷，前日影咗張25件印上格尼路25號波衫嘅相祝佢早日康復，就連受車路士青睞嘅翼鋒基沙文都被打動，講明唔會離隊。皇蘇家陣上下一心，聽朝喺主場對艾爾切實搏盡，撐2.15倍「讓主」！

（開賽時間：周二清晨5:00）
基沙文受感動發留隊宣言

雖然格尼路仲未復出，但佢話明會請嗰班有心球迷，喺聽朝一齊入場睇波，相信一眾隊友都會成人之美，盡力數胡答謝呢班咁好嘅Fans。

查實皇蘇喺今屆歐聯分組賽出局後，回師西甲嘅表現明顯有改善，家陣佢哋已由榜末，重返至聯賽榜上游，為咗爭奪下屆歐洲賽席位，今仗仲點會留手先？
艾爾切客戰例牌多失波

睇埋數據，佢哋近5場聯賽主場勁入19球，火力真係勁到嚇死人！皇蘇首席射手基沙文，賽前又發表留隊言論，有助穩定軍心，加埋佢位拍檔前鋒卡路士韋拿，成功喺上仗打破入球荒後信心大增，有呢對「入球孖寶」壓陣，使驚皇蘇冇「士哥」？

艾爾切上仗喺地頭擊敗華歷簡奴2:0，中止7場不勝走勢，但咪以為佢哋好醒，若果唔係對手喺早段輸12碼兼打少個，艾爾切都未必咁易打開勝利之門啦！

最重要一點，係艾爾切作客表現勁曳，連續5場客戰贏唔到之餘，今季10場作客更只得1次保持清白身，防線擺明信唔過，最大鑊係佢哋件正選門將文奴耶古仲養緊傷，就算中場有卡利斯基爾回歸，但睇怕都唔幫得幾多，好難對佢哋有信心啫。