米堡添兩車手連根拔！

猪拉多纳

今日除咗英超，英冠、英甲都會開快車，阿King睇中一場英冠米杜士堡主場對韋根。米堡近期主場惡氣十足，而且剛由車路士成功借用兩名潛質優厚嘅小將查洛巴及奧美路，戰鬥力進一步提升，有力擊敗近期踢到殘殘哋嘅韋根，米堡上盤可作過關重心。

（周三凌晨3時45分開賽）

米杜士堡現任教頭卡蘭卡係莫連奴執教皇馬時嘅副手，兩人有一定交情，所以米堡得以從車路士手上獲得呢兩名小將加盟，大家唔好睇小呢兩個借將，中場查洛巴係英格蘭U21國腳，被國內傳媒視為明日之星。二十歲嘅尼日利亞後衞奧美路年紀輕輕已代表國家隊十四次，係超霸鷹贏得去年非洲國家盃冠軍功臣之一，如無意外亦會隨隊出征今夏巴西世界盃。米堡得此兩良將，下半季演出隨時有意外驚喜。

米堡近四場主場贏三場，唯一輸波係喺英足盃輸畀英超球隊侯城，表現可靠。韋根近期因要兼顧英足盃，演出明顯走下坡，上次作客竟然淨吞護級分子唐卡士打三蛋，今次面對實力更強嘅米堡注定凶多吉少。