拜仁鋒銳「加」分

猪拉多纳

列貝利成肚火

德甲班霸拜仁慕尼黑喺冬休完返嚟後，又要密密踢。佢哋啱啱喺上星期五深夜先踢完場下半季開鑼戰，今晚又要為補番聖誕前去咗踢世冠盃而延期作客史特加呢場，畀着一般球隊已經頂唔順。不過拜仁叫得做「班霸」，兵源充足到分兩隊踢都有力捧盃，仲要比對手史特加抖多日，兵力上就更加有着數。何況列貝利輸咗個金球獎後怨氣沖天，下半季肯定要「騷哥利」。拜仁讓一球，今場一於撐1.59倍拜仁「讓球客勝」。

（有線61及201周四凌晨3:00直播）

歇冬期間拜仁班傷兵陸續好番，洛賓、列貝利同舒韋恩史迪加等主力抖足後都可以候命，搞到西班牙國腳查維馬天尼斯都無碇企，休季期間佢已經有3場熱身賽都要客串做中堅！再數落去，拜仁仲有卻奧斯同馬里奧葛斯等主將，條中場線真係任哥迪奧拿點出都咁堅，唔怪得漢尼斯賽前都話佢哋已經係世界最勁嘅球會啦！

咪以為拜仁依家喺聯賽領先就會放軟手腳，唔係囉，至少上場休息嘅列貝利同文迪蘇傑戰意肯定好旺盛。列貝利喺金球獎輸咗畀「C朗」後，多次炮轟賽會唔公平，不過觀眾眼睛係雪亮嘅，有咩好得過以球場表現證明自己先係真正「冧巴溫」？至於文迪蘇傑今季入球頻頻，但係下季隨時要將個正選讓畀羅拔利雲度夫斯基，咁梗係要早啲爭番啖氣，等「哥帥」唔好咁容易變心。
卡卡奧或缺陣削史特加火力

史特加歇冬期間去咗南非集訓，不過佢哋本身實力同拜仁爭幾班，前鋒卡卡奧同基斯特又受傷上陣成疑，但總經理波碧賽前都仲話球隊已經有足夠人手，暗示今個月唔會買人。星期六先踢完嘅史特加今場要對拜仁，體力不繼都幾難惡得出樣！
拜仁作客入球王

史特加聯賽主場8戰開出6次「半場大」。

拜仁為聯賽作客進攻王，8戰合共取得21球。

雙方近9次對壘，拜仁全部贏晒，其中6場贏兩球或以上。
頂占筍盤：拜仁（讓球客勝）

拜仁控球率71%傲視歐洲

技術型足球近年橫行球壇，一間統計公司日前公布今季歐洲5大聯賽（英超、西甲、德甲、意甲、法甲）控球率排名榜，由哥迪奧拿帶領嘅拜仁慕尼黑以71.1%排榜首，力壓巴塞隆拿。最估唔到第4位竟然係西甲護級球隊華歷簡奴，至於英超唯一打入前10名嘅只得史雲斯。