富咸保帥菲勝不可

猪拉多纳

英格蘭足總盃第4圈（32強）重賽，英超包尾大幡富咸主場迎戰英甲下游球隊錫菲聯，富咸教頭梅倫史甸隨時收大信封，為咗保住份工，對住英甲仔唔衰得，佢哋上次作客都控制大局，返主場贏得啦！

（now 621及635周三凌晨3時45分直播）

梅倫史甸於冬季轉會窗放走王牌前鋒貝碧托夫，搵返希臘射手美杜古同熱刺德國中場賀治比等人，查實換血冇問題，但衰在上仗主場對修咸頓又吞3蛋，家陣跌到落榜尾，班球迷梗係詐晒型啦。梅倫史甸去年11月加盟富咸拍住祖爾教波，唔夠一個月就攝位坐正，短短兩個零月有機會歷史重演，據悉球會管理層有意搵技術總監古比士利取代佢領軍，如果呢場爆冷不敵英甲仔隨時即炒，新年流流佢都唔想失業，點都會打好今場波。
錫菲聯英甲都踢唔掂

錫菲聯今季於英甲踢落唔夠班，現時位列尾二要護級，球隊攻力甚曳，聯賽首席射手係入咗5球嘅守將哈利馬古尼，班前鋒相當唔掂！錫菲聯上次主場鬥富咸處下風，全場控球率不足三成，今次作客實捱打，頂唔到幾耐，捧主Ｗ啦！