高隆冇糧出必捧競賽會

猪拉多纳

球隊出現財政問題，球員冇得出糧，後果會點真係好難講；早兩年西甲利雲特班球員就同球隊同甘共苦，一直撐住，但上個星期西班牙盃八強次回合，西丙桑坦德對住皇家蘇斯達，球員就因為球會拖欠薪金多個月罷踢抗議，最終桑坦德出局不特止，下季仲冇得參加西班牙盃添。

其實地球另一邊嘅阿根廷球會高隆亦因財政問題，拖咗球員幾個月糧，今季首循環踢踢吓，被國際足協扣咗六分，聽聞早排以過百萬美元賣走咗一個球員，但呢筆錢仍然冇落過球員袋。

舊年揭發歐聯歐霸打假波，德國檢察部門就話，由於東歐球員波糧微薄，令假波集團容易入手，咁如果冇糧出呢？球員都要餬口，點都要諗辦法開飯，高隆球員咁耐冇出糧，仲邊有心機踢吖？今場作客對競賽會，主隊玩得過呀！

（周日早上7時30分開賽）