德國盃8強撐多蒙特「讓客」

猪拉多纳

多蒙特中堅曉姆斯最近先至復出，但日前又整親要抖兩多周，認真冇陰功。好彩，「蜜蜂兵團」呢期表現相當唔錯，嚟緊將會喺3日內兩戰法蘭克福，今晚德國盃8強實行先攞個頭威，撐2.45倍「讓客」！

（無線翡翠台周三凌晨3:45直播）

曉姆斯11月傷出後，1月底對布倫瑞克場波終於復出，原本係大好消息，可惜呢位德國守將復出唔夠一個星期，足踝又試受傷，又要抖多兩星期，月尾先可以復出披甲。相當黑仔嘅「蜜蜂兵團」今季傷親嘅都係重心球員，後衞蘇保迪同右翼巴拉斯塞高斯基收「咧」，中場核心根度簡仍有腳傷，馬高列奧斯、施雲賓達同後防小將艾歷杜姆又打柴，對法蘭克福都唔使預佢哋。

係，雖然班波冇咗幾位猛將，但佢哋以攻為守，米希達利恩同「羅拔仔」都好弗，喺上場聯賽作客照炒雲達不來梅5:1，加上佢哋鬥法蘭克福特別醒神，近4次對賽贏3鋪，嚟緊再鬥法蘭克福兩次，今晚梗係要先贏一仗晉級，攞頭彩先啦！