廠仔「斯基」開行Turbo撞翻燒味紅魔

猪拉多纳

英超今晚繼續開快車，焦點肯定係阿仙奴鬥曼聯場「雙紅大戰」。兵工廠啱啱輸咗鑊甘嘅畀利物浦，領隊雲格矢志做番齣好戲，今晚會派齊兩位「斯基」落場衝鋒陷陣，對住作客阿仙奴唔識贏嘅莫耶斯同佢班「燒味兵團」曼聯，主場讓平半梗係撐上盤啦！

（now621台周四凌晨3:45直播）
上次慘負曼城即反彈

阿仙奴上場聯賽失禮死人，開波20分鐘就畀利物浦隊入4粒，埋單輸1:5收場，聯賽「一哥」席位畀車路士搶咗，最重要係輸得樣衰嘛！賽前老大哥梅迪薩卡同門將施捷斯尼咬牙切齒話要做番齣好戲，施捷斯尼話：「我哋晨早落後4球，但Fans一樣不離不棄，今場點都要用勝利作為補償！」

睇番戰績，阿仙奴對上一次輸得咁大鑊，係上年尾造訪曼城輸3:6，之後兵工廠即刻爭氣錄得8勝2和佳績。領隊雲格當然希望球隊好似上次咁盡快振作，賽前暗示會喺正選陣容作出幾個變動，預計佢會派遣路斯基同普多斯基落場，取代上仗表現麻麻嘅韋舒亞同阿歷士張伯倫，兩位「斯基」論近況同侵略性都一流，「教授」擺到明要搵曼聯祭旗。

之所以話曼聯係「燒味兵團」，皆因紅魔自從由莫耶斯上任後，一眾曼聯戰將個個都好似「燒味佬」上身咁，一味淨係斬、斬、斬。就講上仗畀富咸逼和2:2場波吖，曼聯締造自06至07球季單場最多傳中紀錄，足足作出81次傳中球，弊在冇一次傳中係製造到入球，最離譜係當中只得18腳波係成功傳到畀隊友。進攻模式咁單調，桑馬達再好波、再有創造力都冇用啦！
紅魔得個斬字進攻單調

再講，阿仙奴近11次主場出擊有10場保持清白身，「燒味兵團」曼聯一味靠斬，點睇都唔似會威脅到兵工廠防線，加埋尹佩斯個反骨仔倒戈，以梅迪薩克為首嘅後防戰將肯定睇到佢實，唔會畀佢有啖好食。仲有，莫耶斯喺英超領軍從未作客砌低過阿仙奴，今場點睇都係兵工廠秤先。
Data King 紅魔連開4口半場細

阿仙奴近11次主場出擊只失1球。

莫耶斯喺英超領軍從未作客砌低過阿仙奴。

曼聯連開4口半場細。
乜都玩錦囊 廠仔主場旺2:0再追

曼聯最近兩場聯賽都失分，對住史篤城同富咸都分別失兩球，可想而知佢哋條防線係幾咁流。阿仙奴近8次喺英超主場出擊有6次贏對手2:0，呢個9倍波膽咁旺梗係要兼顧啦！