尾場潘頓友運行

猪拉多纳

　　今晚尾場二班1800米，絕對係最均勢一場，近績好唔係初跑此程就係排外檔，捧得太熱絕對有戒心。比較上，應以「友運行」最四平八穩，今季轉入蘇偉賢馬房後明顯養好，六戰僅田草一役跑得較差，其餘五仗谷草全入前四名，共獲一冠一亞兩季一殿，演出相當準繩。今次賽前更安排試大閘，可見部署仍積極，雖則韋達試完唔騎，但回配贏馬拍檔潘頓，戰鬥力依然強勁。七歲馬難得健康穩定必無保留，排六檔亦好跑，Q膽可靠。

　　「天合」必是同場質素最高一駒，上季尾初跑谷草兼排12檔，竟可單憑一條直路連追多個身位得第三，盡顯場地性能突出。上仗田草1400米拼後即轉場更大幅增程至1800米，加上換個薛寶力上去，大有博你唔信之感，冷門在此。

　　另外第二場五班1800米，「奪目星光」已幾乎肯定獨擅此程，前仗初配杜滿萊即入位，可見人馬合拍，今次再合作攻首本路，係交代時候。「奄尖大少」唔等強項谷草一哩跑今場1800米，何良必然計過度過，而韋達亦揀之並放棄騎開的「彩利」，應該有料到。「壯烈雄心」上場飛到馬到打開勝門，開竅後可能進步到你唔信。(向東)