諾域治主場氣「細」勁

猪拉多纳

熱刺咬佢唔入

熱刺於歐霸盃留力輸波，教頭舒活心意明顯，擺明想返回聯賽爭前4打歐聯，但今晚作客諾域治絕非想像中咁易踢，皆因「金絲雀」主場戰績硬淨，連喪攻王曼城都咬佢哋唔入，今場推介細盤！

（now 621周一凌晨零時直播）

如果大家上周中歐霸盃買咗熱刺捱夜睇波，一定激到嘔血，望住貴價中鋒蘇爾達杜嗰吓近門炒飛機，加埋查迪尼同安祖斯唐辛輪住失機，最終畀迪尼普憑個12碼贏波，堅瞓唔着！今仗王牌射手艾迪巴約、快翼艾朗連儂同中場迪比利等主力回歸，正路會好番多少，但作客仍欠必勝把握，讓波唔抵玩。
近3次對碰全開細

諾域治護級壓力甚大，主帥曉頓成為英超下一個被炒教頭熱門人選，但查實「金絲雀」近期打落唔差，前仗主場對住曼城守得穩陣，成功悶和對手，踢出今季其中一場代表作，而後防加入咗前愛華頓中堅尤保後更加硬淨，踏入2014年聯賽主場3戰保持不失，結合兩軍近3次碰頭全細賽績，捧細好路。