小保加得個殼 平手盤撐學生隊

猪拉多纳

玩波齋玩名氣真係大忌，好似小保加咁，一年比一年退化，今季阿甲3戰得1分，真係信佢一成都雙目失明，聽朝就算主場對住「一哥」學生隊都冇着數，呢場波開平手盤，點都係博客軍學生隊穩陣啲。

開賽時間：周一清晨5:15）
小保加開咧3戰1和2負

小保加名氣有幾大唔使多講，但係呢兩年喺「總督」比安基手下，變得愈嚟愈暮氣沉沉，今季阿甲開咧以嚟，3場波得1和2負仲未開齋，球員同主帥之間開始關係緊張，其中前鋒艾曼紐傑利奧迪上場波對拉費爾拿，雖然冇乜好突出嘅表現，連《奧萊報》都評佢只值5分，不過小保加响呢場敗仗，幾乎冇一個踢出水準，最高分嘅門將奧利安都係得6分僅僅合格，中場加高直情衰到得3分，勢估唔到比安基居然只係批評艾曼紐傑利奧迪「作戰態度唔好」，咁講法其他球員又好醒咩？實情係有8個人仲低分過佢，比安基呢種搞法，班人點會服先？

自從踏入2014年以嚟，小保加連友賽7戰完全未贏過，教練比安基難辭其咎，但係佢仲諉過於人，隊波嘅士氣又點會好吖，而且小保加近6次主場撼學生隊，勝和負各佔兩場全無優勢，依家仲要狗咬狗骨，真係好難相信佢哋會即時反彈，就算足智彩個主勝尋日由2.55倍下調至2.52倍，一樣信唔過。
學生隊全勝士氣爆燈

學生隊就剛啱相反，開季3戰全部Win晒，最難得係3戰入3球嘅古度卡里路，對場波嘅態度好正面：「唔易打，但我哋會努力爭勝，呢場係個性之戰。」對住廢咗一半武功嘅小保加都當老虎去打，士氣旺盛又謹慎嘅學生隊，點睇都唔似會出事，平手盤梗係博客勝。