馬房秘聞：伍碧權寧舍緊張大勇

不死鸟

▲正所謂拜得神多自有神庇佑，伍碧權馬房上周拜神之後，果然響上周五贏「寰采商人」增添頭馬，依家仲欠四場頭馬就畢業，難怪權哥近日晨課都相當積極，其中「大勇」係佢較緊張之馬，周日賽後權哥返馬房仲特登安排呢匹馬行機增加運動量，為明晚之戰做好準備，睇嚟爭勝決心好大。

　　▲「金鑽龍華」今季已經贏咗兩場，同主馬「金堡龍華」早前亦一出即勝，馬主真係旺得交關。上周二此駒馬主約都爾響西貢食海鮮，順便商議軍情。經了解馬匹近況後，馬主對於今仗爭勝都好有信心，但就認為改配本地騎師減磅會更有把握，所以華哥就搵咗楊啟棠一試。噚朝楊啟棠替「金鑽龍華」作最後試跑後，更被華哥叫入馬房寫字樓翻睇近仗影帶，今鋪必打硬仗。

文家良柏寶創佳績

　　▲由於「創佳績」馬主早排不在港，所以文家良響報名前亦要打長途電話向馬主匯報，先至落實出戰今場賽事。呢匹馬季內五戰仍未交代，今仗吼準曾五捷嘅谷草一哩上陣，可以話滿肚密圈，噚朝柏寶替此駒作最後試跑，之後文家良即前往機坪接馬，並與柏寶商議軍情，呢路人馬絕對不能小覷。