德國次世代圍剿智利

猪拉多纳

德國今晚鬥智利，領隊勒夫選咗4件新兵，畀班後生仔感受吓國家隊比賽嘅氣氛。雖然智利今戰以經驗球員為骨幹，不過「猛虎不及地頭蟲」，何況對手係頂級勁旅德國？一於捧2倍「讓主」啦！

（now633台周四凌晨3:45直播）

德國中場基迪拉同根度簡今季大部分時間都係休養，「大腦」舒韋恩史迪加雖然有入選，但最近先好番，狀態未去到十足，有見及此，勒夫就揀咗奧格斯堡嘅安達夏恩；後防大將曉姆斯養傷，勒夫選埋馬菲亞斯真達同梅斯達菲入伍。講到鋒線，漢堡射手拉蘇加亦係第一次入選，呢班後生仔係冇國際賽經驗，不過佢哋今季表現出色，絕對係有實力嘅生力軍。

智利繼續以巴塞翼鋒阿歷斯山齊士擔正攻堅，祖記嘅維達爾則坐鎮中場。雖然呢兩位球星有料到，但其他隊友實力麻麻，同德國有一大段差距，今晚仲話要作客添，想破蛋都有難度喇！