筍盤益你：吉利大哥惡氣十足

不死鸟

逢親上演跑馬地賽事，唔少賽果都熟口熟面，來來去去都係嗰批馬，事關呢條鑊形跑道好難跑，一啲名氣馬如初次跑谷草，隨時淺水浸蛟龍﹔相反，如果馬匹初跑谷草即贏，咁日後渡江上陣就有秤先必要。

　　第二場四班一六五○米，「吉利大哥」近兩季共十戰全數三甲不入，但六歲馬近排冇病冇痛，估計減到依家嘅四十八分，點計都會有着數﹔記得前季佢初跑谷草即喺同程贏馬，雖然嗰次排一檔有利，但至少證明窄場一定啱跑。上仗排十檔跑谷草一哩，形勢不利下輸三個馬位畀「霹靂子彈」，但今仗「吉利大哥」抽得一檔，計落應有反先能力，回配贏馬拍檔柏寶有晒手影，值得作為重心。

　　今晚足智彩焦點，唔使問梗係集中喺車路士鬥巴塞隆拿呢場歐聯大戰身上，首回合車仔作客魯營球場踢成○比○，呢場如果巴塞入到波，主隊至少要入多客隊一粒先可以晉級。但數據上就傾向支持車仔，事關近五次巴塞作客鬥車仔，居然只得一勝四負，難怪莊家只開平手盤。

　　既然邊隊贏都唔奇，今次不如博入球細，事關首回合冇交收，今仗雙方早段未必心急搶攻，而上仗車仔成功凍結美斯，如果今次戰略繼續成功，巴塞鋒力的確會大大減弱，但係客隊一眾球星今季弗到漏油，你話會突然大敗又冇乜可能，諗落買入球細比較穩陣。