水手作客受讓有利

猪拉多纳

今日晏晝球彩台又有澳職直播，可以一路歎住下午茶一路睇！常規賽季就快完結，依家除咗布里斯班獅吼帶出咗七分、十拿九穩攞到常規賽冠軍之外，仲有六隊可以爭入季後賽，就連榜尾嘅珀斯光輝都仲有機會爭個出線名額，剩低六場波，真係一分都唔可以失！

今日對賽嘅兩隊墨爾本勝利同中岸水手，兩隊同排第三嘅阿德萊德聯一樣都係得三十分，不過就排喺第四、五位，大家下周中都要踢亞冠盃。其實澳職球隊踢亞冠冇乜着數，尤其係依家聯賽爭位爭得咁緊張，雖然話排緊頭六位之內啫，但排第七、八嗰兩隊都係差四分就可以殺到上嚟，仲要分開兩條戰線，隨時變雙失！好彩勝利同水手嚟緊亞冠盃都可以留番喺主場出戰，唔使飛嚟飛去，咁球員都多番啲時間休息。
勝利陣容不整 上仗慘敗

雖然勝利有柏保路干查拉斯停完賽復出，但始終陣容都係單薄咗啲，米利根同湯洛積被國家隊徵召，幾個廿歲出頭嘅後生仔好似占士捷高、納博特等都要準備為勝利上陣，呢場就算有主場之利都難以睇好！睇番上星期佢哋作客同墨爾本雄心踢嗰場打吡都要輸四蛋，就知狀態麻麻哋啦。反而客軍水手上場2比1贏FC悉尼嘅表現，就同個賽果一樣：幾好！今場作客有得受讓平半都唔錯，一於支持水手啦！

（有線64及203台周五下午4時30分直播）
妹頭推介

墨爾本勝利Vs中岸水手

中岸水手（下盤）