馬拉加受讓信得過

猪拉多纳

承諾擁躉踢爭氣波

馬拉加今季因為流失主力搞到戰績下滑，一班球迷上周唔滿意愛隊捲入降班漩渦，聚集喺球會門外抗議，結果要班球員承諾努力改善戰績先至平息件事。今晚佢哋造訪奧沙辛拿肯定想做番場好戲，睇番佢哋過往喺「奧沙」主場經常搶到分，既然馬拉加受讓平半，一於支持1.9倍下盤。

（開賽時間：周二凌晨3:00）

馬拉加季初因財政問題「極速瘦身」，射手沙維奧拿、中場艾斯高、祖亞昆等多名主力紛紛離隊，即使球會搵嚟前皇馬主帥舒斯達接手，巧婦亦難為無米炊。上周三有接近150個擁躉仲抗議要求舒斯達落台，好在中場杜達同球迷傾掂數，應承成Team人嚟緊會努力改善戰績，同時亦表明全隊都撐舒斯達繼續執教，馬拉加今晚唔即刻「交貨」氹球迷點掂先？

事實上，馬拉加最近表現已經有好轉，只係欠運先連和兩場。由近戰表現去睇，班兵仲好有鬥心，前鋒艾咸達奧、門將韋利卡巴尼路講明願意留隊奮戰，配合射手辛達告魯斯、中場杜達、伊拿斯奧甘馬曹等實力戰將，的確有一拚之力。
近11次交手僅1勝奧沙辛拿往績輸蝕

奧沙辛拿近11次主場同馬拉加交手，竟然錄得1勝6和4負，齋睇呢點已經蝕到喊，加上首席射手奧利奧爾尼亞拿陷入球荒，中場施斯干沙利斯、米基爾古華斯又唔踢得，今仗對住眾志成城嘅馬拉加，搶到1分都偷笑啦！