皇蘇有心有「歷」大炒復仇

猪拉多纳

皇家蘇斯達兩大射手卡路士韋拿、基沙文今季入球停不了，依家喺西甲排第6嘅佢哋，早兩輪仲要喺主場砌低巴塞成為今季代表作。皇蘇明晨會喺主場迎戰排尾2嘅華歷簡奴，要大勝一場冇乜難度，一於撐2.15倍嘅「讓主」！

（開賽時間：周二清晨5:00）
華歷簡奴作客唔掂主將查舒拉斯停賽

皇蘇今季喺主場經常大炒中下游球隊，好似奧沙辛拿、貝迪斯同艾爾切都係佢哋「刀下亡魂」。無他嘅，卡路士韋拿同基沙文兩位射手今季做咗「入球機器」，後者仲喺射手榜暫列第4位，今戰即使有守將安素迪古同門將哥迪奧巴禾齊做十字軍缺陣，相信對戰力都唔會有太大影響。

至於喺降班漩渦掙扎緊嘅華歷簡奴，今季作客表現曳到爆，13場作客輸8場共失30球，只係比包尾失35球嘅貝迪斯好少少！佢哋今場仲有主將查舒拉斯停賽，又點靠得住呀？

係，雖然華歷簡奴首循環主場係贏過皇蘇1:0，但今戰去到人哋地頭都好難惡得出樣，一於撐皇蘇大勝一場，報番首循環一敗之仇。