水手新兵未夾熟 三箭o靚仔孭飛一樣掂

猪拉多纳

亞冠盃第2輪分組賽今日開打，打頭陣有F組嘅中岸水手主場火併廣島三箭。水手自從由莫斯掌舵後戰績一落千丈，以麥西蒙為首嘅新兵仲話未夾熟班隊友，怪唔之廣島三箭敢派後生仔上陣搏殺，睇嚟對今仗胸有成竹，小讓平半一於捧上盤。

（now670台周二下午4:30直播）
三箭首爾睇波團1.5萬蚊位

莫斯上年11月坐正後，水手表現愈嚟愈差，單係由2月頭打落嘅7場波就輸足6場，上輪聯賽作客輸畀墨爾本勝利1:3後，兩位喺冬季轉會窗加盟嘅新兵包括前鋒麥西蒙同中場馬高斯科利斯都異口同聲話，仲要時間適應球隊踢法，坦承未夾熟班隊友，戰績差真係無可厚非。

反觀力爭日職三連霸嘅三箭開咧兩戰全勝，尋日已經飛抵澳洲嘅佢哋，今次仲冇帶中場米傑治同前鋒佐藤壽人，消息指佢哋會倚重近兩仗都有波入嘅鹽谷司等後生仔掛帥，擺明覺得水手易啅。再講，三箭已經搞緊4月1日造訪FC首爾嘅睇波團，波飛連交通食宿每位盛惠21萬日圓（約1.5萬港元），預計今仗亦會有大批球迷隨隊打氣，要砌低水手冇難度吖！