美斯復甦巴塞趁早買

猪拉多纳

奧沙辛拿遇強隊輸晒

神奇、不可觸摸、難以置信，呢幾個形容詞係傳媒用嚟讚揚美斯，上周中喺歐聯玩到班曼城後衞陀陀擰嘅精彩演出。既然呢位巴塞球王全面復甦，今晚喺魯營迎戰遇強例輸嘅奧沙辛拿，1.42倍「讓主」讓到兩球都照捧可也。

（now632台周一凌晨0:00直播）

美斯喺歐聯演出搶鏡，除咗得到傳媒激讚，就連名宿連尼加都唔例外，話睇見美斯該場嘅表現，令佢意識到自己當年踢波有幾爛，又話美斯喺呢場波所做嘅高技術動作，比起佢整個職業球員生涯仲要多。

巴塞受惠美斯復甦，教頭馬天奴亦重新振作，上輪聯賽倒灶不敵華拉度列後被鬧爆嘅佢，直言「地上最強」成功挽救負面形象之外，今晚對奧沙場波都仲未踢，已經信心爆棚話下輪「國家打吡」可以喺巴拿貝贏波而回。
射手啞火 奧沙[+2]都難捱

當然啦，歐聯大戰過後國家打吡在即，馬天奴今場難免會收起部分主力，好似佩奧爾、碧基就一定唔踢，不過巴塞今戰有弗爆嘅美斯擔大旗，所謂「副選」更係柏度洛迪古斯、阿歷斯山齊士呢啲國腳級球員，面對實力差兩班嘅奧沙辛拿，正好以大勝為下場作客皇馬壯行色。

另邊廂嘅奧沙辛拿，首循環鬥巴塞嗰陣十字韌帶重創嘅翼鋒施斯干沙利斯，終於喺日前正式復操，可惜距離復出言之尚早，好衰唔衰中場悍將米基爾古華斯亦要養傷。再者，奧沙今季面對西甲前8名球隊全部輸晒，首席射手奧利奧爾尼亞拿更正值入球荒，連續4場聯賽踢足都冇斬獲，相信今場難逃大敗。