戰駒換人騎告東尼擺明搏

猪拉多纳

　　告東尼之前收咗吳嘉晉做徒弟，暫時未有重用，提供坐騎唔係多，現階段彼此仲係摸索緊。假以時日，嘉晉仔學有所成，騎技有進步，呢位師父點會孤寒，反正係等人用之際，有個5磅仔喺身邊，好使又好用，如果跑至季尾時分，人疲馬乏，騎師有磅減，點都好跑啲。

　　呢對師徒暫且未加強合作，但係近期告東尼在調兵遣將方面，唔再似得以前咁着重蔡明紹，開始同其他騎師多咗合作，就以呢次為例，6匹賽駒只有1匹配上蔡明紹。

　　有時跑得多，啲馬可能會「滑牙」，長期由同一位騎師執韁，冇晒新鮮感，好難再有火花，尤其係蔡明紹呢類「海鮮騎師」，演出波動極大，畀佢跑完啲馬，換人試吓不失為對策。

　　馬利多隨時放到

　　今晚第六場「英勇大師」，上次蔡明紹發揮之差，真係睇到眼都凸，呢次即刻轉用韋達，告東尼擺明係想拼個明白。另外，第五場「馬利多」，配搭換來換去，表現未有起色，搵到巫斯義，唔講得笑，呢類前領馬喺佢手上，隨時慢放帶到。（Jack）