諾在其中:武士神駒轉倉即拼

不死鸟

小妹一向覺得跑禮拜六就最好，事關周日可以盡情休息一吓，或者同朋友玩餐飽。初步心水係第五場四班千二米草地，初出嘅「鐵哥們」係馬主嘅上屆香港國際拍賣會購入，不過買咗冇耐隻馬就周身唔妥，本來安排喺今年一月一日初出跑田草直路賽，但就因為右前腳不良於行要退出。所以有時候做馬主都幾苦惱，自己用?咁多錢買匹馬，可惜健康卻出現問題，醫番好後又未知有幾大影響，最怕仲係冇哂鬥心，聽日大家不妨睇吓呢匹身價達二百四十萬嘅馬跑成點。

        同場最鍾意「特好」，呢匹馬只跑兩仗，前仗首度登場跑田草一千米，臨場捧成3.5倍大熱門，最終後上甚勁險勝「跑得叻」同「相見歡」，一出即勝的確犀利。上仗增程跑千二米，亦只係輸畀「帝豪龍駒」個幾馬位跑第二，今次強敵已去，係時候補中。

        第六場四班千四米，「武士神駒」至今跑四次，前仗同程輸個半馬位畀「金添好運」，嗰次「武士神駒」已貼欄慳晒位，可惜都唔夠頭馬跑，明顯兩駒質素有分別之餘，早前鄭雨滇手風亦麻麻，所以呢隻馬冇乜表現可以理解。依家「武士神駒」由沈集成轉廐去方嘉柏馬房，埋門曾交畀柏寶試大閘，操練相當積極，今次人馬合作跑曾入Q路程，似乎練馬師好心急交代，值得馬迷優先留意。