AC衰權鬥撐拉素上盤

猪拉多纳

今時今日識玩意甲，一定係買ＡＣ米蘭對家。事關ＡＣ內部權鬥再起風雲，由於成績低迷，令原本失勢嘅高層加利安尼趁機發難，日前向屬於太子女芭芭拉親信嘅少帥施多夫訓話，擺明想挑戰芭芭拉領導權威。施多夫同球員夾喺中間，左右做人難，加上成日家嘈屋閉，肯定影響軍心，ＡＣ今晚作客拉素，一於再反「紅黑兵團」，拉素小讓平半力捧上盤。

（TVB 301周一凌晨3時45分直播）
施多夫教波未夠班

ＡＣ米蘭除咗莫財，仲受管理層權鬥影響，太子女芭芭拉掌權後，炒咗前主帥阿里基，搵來毫無教波經驗嘅施多夫領軍，事實證明屬於錯誤決定，令芭芭拉逐漸失去各界信任。有傳連爸爸貝魯斯干尼都對佢有微言，難怪加利安尼夠膽搵施多夫「照肺」。事實上，施多夫根本未夠班教大球會，球季結束後執包袱勢必成事實。球隊爭歐戰資格基本無望，降班又未輪到佢哋，可以話係等收鑼，試問仲邊有爭勝決心，只會繼續尋底。