馬房秘聞:太平洋老馬胃口好

不死鸟

▲九歲嘅「太平洋」今季狀態長勇，十二次上陣僅一仗冇獎金收，令馬主大感滿意。周三呢隻馬游水，胡森親自帶埋長鞭監督，以免馬匹扭計，而噚朝呢匹老馬行機，更好火到搶住走，令馬伕扯到手軟。

         一班手足話「太平洋」上仗前響食料內加入咗呂宋草，由於唔適應所以演出回落，但今仗賽前已用番法國草，令呢隻馬食慾大增，今次一定會繼續搏殺。

        ▲至於另一匹胡廐馬「風陵渡」，雖然季內曾流鼻血，但健康情況已受控制，近兩仗均跑入前六名。拼後馬匹狀態仍保持得好，近期下晝多由副練親自加課，馬房都對此駒狀態感到滿意。馬主昨午更帶埋甘筍入馬房親自餵「風陵渡」，並請一班手足食西餅，似乎對今仗寄望甚大。

        ▲「幸運小寶」季中曾經因為血液不正常而退出，復出後表現普通，主要係由於呢隻馬腸胃唔好，食料麻麻導致狀態欠佳。不過此駒近期響馬房悉心治理之下，腸胃問題已經解決，食慾大增之餘，仲餐餐掃清食料盤，馬房認為陣上表現必會有所改善。剛戰沈廐有「按得快」搏殺得手，今次向大摩借用白德民騎「幸運小寶」，鬥志唔使懷疑，值得捧場。