國米兵除烏保飯碗

猪拉多纳

意甲周中快車壓軸戰，國際米蘭主場對烏甸尼斯，國米老闆托希爾開晒腔話下季大換血，由教練馬沙利以至射手柏拉斯奧都有可能被叮走，餘下9場聯賽成為佢哋最後考核機會，想保住飯碗，就要落多幾錢肉緊。烏甸尼斯護級壓力已大為紓緩，作客往往中門大開，啱晒國米做齣好戲氹老闆開心，國米讓半一照博上盤。

（TVB 301周五凌晨3時45分直播）

國米上仗臨尾香，連續6場不敗走勢斷纜，隨時連下屆歐霸盃席位都不保，賽後新班主托希爾黑晒面，講明隊內所有人都屬於「考察之中」，意味隨時會喺球季結束後被踢走。意國傳媒率先指門將漢丹洛域屬高危一族，教練馬沙利亦係開刀目標，甚至射手柏拉斯奧嘅位置亦唔穩陣，因為托希爾透露，準備收購頂級前鋒，明顯唔滿意柏拉斯奧等進攻球員嘅表現。國米陣內現時人人自危，餘下賽事應會搏命自保。
烏甸尼斯作客腳軟

烏甸尼斯上仗擊敗護級對手薩斯索羅，已逐漸擺脫降班漩渦，心理上可回一回氣。烏甸今時今日仍然要靠36歲老將迪拿達利攻堅，但佢畢竟年事已高，上仗即使為球隊一箭定江山，但亦射失12碼，顯得力不從心，更何況今次一周雙賽，恐怕呢位老人家吃不消。

另外，烏甸今季一直靠主場搶分，作客放軟手腳，近3仗客場賽事，狂失9球，包括吞卡利亞里3蛋，今仗去到聖西路球場實在冇運行。